САРАЛАП ОҚЫТУ ЖАҒДАЙЫНДА СОКРАТТЫҚ СЕМИНАРЛАР МЕН КАПЛАННЫҢ ТЕРЕҢДІК ПЕН КҮРДЕЛІЛІК БЕЛГІШЕЛЕРІН КІРІКТІРУ АРҚЫЛЫ 9-СЫНЫП ОҚУШЫЛАРЫНЫҢ СӨЙЛЕУ ДАҒДЫЛАРЫН АРТТЫРУ

Аңдатпа

Оқушылардың сөйлеу дағдыларын дамыту ағылшын тілін шет тілі ретінде оқытудағы маңызды міндеттердің бірі болып табылады. Әсіресе оқушылардан академиялық пікірталастарға қатысу, өз көзқарастарын дәлелдеу және сыни ойлау дағдыларын көрсету талап етілетін жағдайда бұл мәселе ерекше өзектілікке ие болады. Аталған зерттеу Капланның Depth and Complexity жүйесіндегі үш белгішені – Multiple Perspectives, Unanswered Questions және Details – Сократтық семинарлар құрылымына кіріктірудің 9-сынып оқушыларының сөйлеу дағдыларына әсерін анықтауға бағытталған. Зерттеу Қарағанды қаласындағы Назарбаев Зияткерлік мектебінің жаратылыстану-математика бағытында оқитын 32 оқушының қатысуымен жүргізілді. Қатысушылар эксперименттік (n = 16) және бақылау (n = 16) топтарына бөлінді. Зерттеу барысында квазиэксперименттік алдын ала және қорытынды тестілеу әдісі қолданылды. Интервенция басталғанға дейін барлық оқушылар сөйлеу дағдылары бойынша бағалаудан өтіп, пікірталасқа қатысуға деген сенімділігі мен көзқарасын анықтайтын сауалнама толтырды. Зерттеу соңында осы құралдар қайта қолданылды. Нәтижелер эксперименттік топ оқушыларының сөйлеу еркіндігі, академиялық сөздік қоры және аргументация сапасы бойынша жоғары нәтижелер көрсеткенін дәлелдеді. Сонымен қатар, оқушылардың ағылшын тілінде сөйлеуге деген сенімділігі мен талқылауларға қатысу белсенділігі артқаны анықталды. Зерттеу қорытындылары Каплан белгішелерін қолдану саралап оқытуды ұйымдастыруға және оқушылардың академиялық сөйлеу дағдыларын дамытуға тиімді ықпал ететінін көрсетті.